Narrator 1 Ассалому алайкум қадрдонлар. Фарзанд туғилганидан сўнг, уларни соғлом ва ақлли қилиб тарбиялаш ҳақида ўйлаймиз. Аммо шундай ота-оналар борки, фарзандлари туғилиши биланоқ, уларнинг соғлиғи, тарбияси, ҳимояси билан бирга келажакда ўзларига мос келадиган турмуш ўртоқ топишлари учун ҳам ибодат қилади. Бунинг учун ҳали жуда эрта эмасми, дерсиз?! Аммо фарзандлар учун ибодат қилиш ҳеч қачон эрта бўлмайди. Биласизки, фарзанднинг турмуш ўртоқ танлаш борасидаги ҳатоси ва кейинчалик ажрашиш истаги, оиланинг бошқа аъзоларига ҳам жиддий таъсир кўрсатади. Бу ҳеч кимга ёқмайдиган оғриқли жараён ҳисобланади. Севимли фарзандларимиз ҳаётида шундай бўлмаслиги учун келажак турмуш ўртоқлари учун кичиклигидан ибодат қилсак арзийди.

Narrator 2 Фарзандингиз учун ким энг яхши қаллиқ бўлишини фақат Худо билгани учун, У бу борада энг доно маслаҳатчи ҳамдир. Фақат Унинг фикри тўғри ва ҳал қилувчи бўла олади. Муваффақиятсиз турмушни бошидан кечирган танишларингиз бўлса керак. Уларнинг ҳаётларига эътибор қилинг. Хотинларининг уқувсизлиги, эрига бўлган ҳурматсизлиги ва яна бир қанча камчиликлари ё бўлмаса эрларнинг қўполлиги, хиёнати ва яна бошқа талайгина сабаблар уларнинг айрилишига сабаб бўлган. Кейинчалик фарзандларимиз турмуш ўртоқ танлашда адашмасликлари учун, Худовандга ибодат қилиб улар учун энг яхши ва мос келадиган жуфт танлашига ёрдам беришини сўрашимиз керак. Улар ҳали ёш деманг, тез орада уларнинг катта бўлиб қолганини сезмай ҳам қоласиз.

Narrator 1 Яна бошқа томондан қарасангиз, ҳаётларида турмуш ўртоқларнинг кўплаб камчиликлари бўлишига қарамай, ҳамон бирга яшаётган жуфтларни ҳам биласиз. Балки улар турмуш қургач, бир-бирлари учун ибодат қилишгандир. Биргаликда узоқ умр кўришни, бир-бирини тушунишга ёрдам бериши учун Худодан сўрагандир. Шундай бўлиши ҳам мумкин. Агар эшитган бўлсангиз, эр-хотинларнинг иттифоқи самода бирикади. Албатта агар биз икки инсонни ўз ҳукми билан боғлайдиган Зотга бу ҳақида ибодат қилсак, бу нарса албатта амалга ошади. Дабдабали тўйлар, олди-бердилар, сеплар эр-хотинларга бахт бера олмайди. Фақат Яратгангина уларга бахт ато этади. Муқаддас Каломда шундай дейилган: «Инсоннинг юрагида ният кўп, лекин фақат Эгамизнинг айтгани амалга ошади» (Ҳик 19:21).

Narrator 2 Биз катталар фарзандларимиз катта бўлиб қолгач, уларни келажак ҳаётга тайёрлай бошлаймиз. Оналар қизларига ўгитлар қиладилар, турли ҳунарлар ўргатадилар, оталар эса ўғилларга ҳақиқий ва чинакам эркак бўлиш учун нималар қилиш кераклигини, инсон ўзини қандай тутиши кераклигини ўргатади. Катталарнинг ўгитлари яхши, аммо улар ҳам инсонни бахтли қила олмайди. Фақат Худовандгина уларни чинакамига бахтли қилишга қодир. Агар ёш келин-куёвлар Худованддан йўл-йўриқ сўраб, ибодат қилсалар, Раббимиз албатта уларга ёрдам беради. Худоваднинг Муқаддас Руҳи турмушни мустаҳкамлайди. Унинг Руҳи болаларимизни тўғри йўлга бошлаши учун ҳозирданоқ ибодат қилайлик.