3:43

Боланинг тўғри ривожланишига ёрдам берадиган массаж

MP3

Ассалому алайкум. Биз аёллар бола тарбияси ва саломатлиги ҳақида кўп гапирамиз-у, аммо унинг соғлом бўлишига яхши таъсир кўрсатадиган массаж ҳақида унутиб қўямиз. Аслида фарзандни массаж қилиш учун унча кўп вақт кетмайди. Бунинг учун онадан озгина билим ва қунт талаб этилади ҳолос. Шундай экан, бугунги суҳбатимизни болага қилинган массажнинг фойдалари ҳақида давом эттиришни маъқул топдик. Бир ёшгача бўлган болани массаж қилиш уни парвариш қилишнинг муҳим қисмини ташкил этиши керак. Массажни онанинг ўзи ҳам қилаверадими ёки мутахассисга мурожаат қилиш керакми? Малакали болалар массажистига қачон эҳтиёж туғилади? Қайси ҳолларда болага даволаш массажи тавсия этилади? Шу каби саволларга жавоб топиш учун ушбу мақолага бир ёшгача бўлган болалар массажи ҳақида керакли маълумотларни тўплашга ҳаракат қилдик.

Мутахассисларнинг фикрича, мунтазам равишда массаж қилинган болалар тенгдошларига нисбатан эртароқ ўтиришни, эмаклашни, юришни ўрганишади. Улар массажни чақалоқ 6 ҳафталик бўлган вақтдан бошлашни тавсия этишади. Ундан олдин албатта шифокордан маслаҳат олиш зарур! Эмизикли болаларга массаж тавсия этиладиган ҳолатлар: асаб тизими, суяк-мушак тизими касалликларида, сунъий овқатлантиришда бўлса, ривожланишда орқада қолаётган бўлса, вазн етишмаслиги ёки ортиқчалиги ҳолатларида, бирон-бир юқумли касалликни бошидан ўтказган бўлса. Эмизикли болалар учун массажнинг фойдалари ҳам анчагина. Бунда мушаклар тонуси яхшиланади, кучи ва эластиклиги ошади, бўғинлар эгилувчанлиги яхшиланади, бола организмининг ҳимоя кучлари фаоллашади, ҳаракатлар координацияси ривожланади, рахит касаллиги асоратларининг олдини олишда ёрдам беради, таянч-ҳаракат тизими мустаҳкамланади.

Кўпгина касалликларнинг асл сабабчиси — организмда моддалар алмашувининг яхши эмаслигида. Массаж пайтида эса моддалар алмашинуви кучаяди, овқат ҳазм қилиш яхшиланади, ич қотиши, дам бўлишининг олди олинади. Кўрдингизми, биргина массаж боладаги анчагина муаммоларнинг ечимига айланиши мумкин экан. Бундан ташқари, болада қон айланиши ва юрак иши яхшиланади, тер ва ёғ безлари фаолияти яхшиланади, боланинг асаблари тинчланиб, уйқуси яхшиланади, иштаҳаси очилади. Бу фойдали таъсирлар натижасида боланинг ақлий ва жисмоний ривожланиши тезлашади. Соғлом болага массажни бир ёшга киргунча ҳар куни қилган яхши. Бошида тиббий маълумотга эга бўлган тажрибали мутахассисга мурожаат қилиб, кейинчалик онанинг ўзи ўрганиб олгач, ўзи қилиши ҳам мумкин. Бунда албатта, ҳар 3 ойда мутахассис ёрдамидан фойдаланиб, боланинг ёшига мос массаж ҳаракатларини кўриб, ўрганиб олган маъқул.

Эсингизда бўлсин, массажнинг барча ҳаракатларини куч ишлатмасдан, кучли босимсиз бажариш керак. Массаж бола овқатланишидан бевосита олдин ёки кейин қилинмайди, 60 дақиқалик танаффус сақланади. Массажни бола ухлашдан олдин қилган яхши. Массажни бола ихтиёрига қарши қилиш керак эмас, агар бола инжиқланаверса, кейинга қолдирган маъқул. Болани массаж қилиш учун унда кўникма ҳосил қилишга ҳаракат қилинг. Шундай қилинг-ки, бола бу пайтни ёқимли деб қабул қилсин. Бу пайтда уни эркаланг, суҳбатлашинг, хуллас севгингизни кўрсатинг. Иложи борича болангизда бирор бир касаллик аниқланмай туриб, уни массаж қилишни бошланг. Онанинг ўз боласини меҳр билан силаши, болага нафақат танавий балки руҳи ҳам куч беради. Болада бирон-бир касаллик аниқланган бўлса ёки ривожланишда орқада қолаётган бўлса, массаж муолажанинг бир қисми ҳисобланиб, албатта малакали мутахассис томонидан шифокор тавсияси билан амалга оширилиши керак.

Добавить комментарий

Ваш адрес email не будет опубликован. Обязательные поля помечены *

Scroll to top